Vör teihn Johren harrn wi Krieg in Europa. In dat ole Jugoslawien hebbt orthodoxe un katholsche Christen un Muslime opeenannner schoten, Flegers hebbt ehr Bomben un Raketen afschoten un Fruun, Kinner un Mannslüüd sünd dorbi doot blewen. Nu hebbt wi dor sowat as Freden, aver in ‘n Irak, in Palästina un Afghanistan warrt noch schoten. Man all Minschen hebbt Sehnsucht na Freden. 

Over Silvester un Niejohr harrn wi fief Dagen in ganz Hamborg Besöök vun 60.000 junge Minschen ut dat hele Europa, de dat Europäische Jugendtreffen vun de Bröder ut Taizé na Hamborg ropen harr . „Pilgerweg des Vertrauens auf der Erde“ weer dat Motto för düt Treffen. Op ‘n Bahnstieg an de Elbgaustraat heff ick junge Lüüd ut Rom, Barcelona, Novi Sad, ut Frankriek, Holland, Lettland un Russland dropen. Wat se nu evangelsche, katholsche oder orthodoxe Christen weern, speelt keen Roll. Bi uns in ‘t Huus hebbt wi orthodoxe Christen ut Serbien vun de Grenz na Rumänien to Besöök hatt. In de Messehallen hebbt se mit de Bröder vun Taizé sungen, beet, dis-kereert, eten un drunken. Sungen hebbt se in vele Spraken, solange, bet all de Leder mitsingen kunnen. Nich bloß op Latein, Französch un Dütsch, nee, ok de in Polnisch, Spaansch, Litauisch, un all de annern Sproken. De jungen Minschen hebbt sick to ‘n Deel mit Hannen un Fööt ünnerholen. Aver se weern sick in eens enig: wi mööt mit alle Middel Freden in de Welt schaffen, mööt Frünnen söken in anner Länner, mööt uns kennenlehrn. 

Frere Roger Schutz, hüüt 88 Johre olt, hett de Taizé Gemeenschop gründt. Sied 26 Johren gifft dat to ‘n WesseI vun de Johren de Pilgerfohrt vun junge Lüüd in en Grootstadt. Frère Roger hett för sien Arbeit för den Freden den Aachener Karlspreis un den UNESCO-Preis für Friedenserziehung kregen (villicht is he ok Kandidat för den Friedensnobelpreis!). In sein Breven ut Taizé, de elkeen Johr rutkomen, sünd nich bloß Tipps för de Arbeit in de Karkengemeenen, ok Grußworte vun Papst Jo-hannes Paul II., Patriarch Alexis II. vun Moskau, Rowan Williams, Erzbischof vun Canterbury un vun Kofi Annan, wat de Generalsekretär vun de Vereinten Nationen is, sünd dor afdrückt. 

In sein Breef ut Taizé seggt Frère Roger: „Nicht nur die Verantwortlichen der Völker gestalten die Zukunft. Ganz einfache Menschen, kleine Leute, können dazu beitra-gen, eine Zukunft des Friedens und des Vertrauens aufzubauen.“ Dor wüllt wi lütten Lüüd ok hier bi uns mit hölpen. 

Thies Meester 

aus „Eidelstedter Anzeiger, Wochenzeitung für Hamburg-Eidelstedt, Stellingen, Schnelsen, Halstenbek und Schenefeld“, Mittwoch 14.01.2004, Seite 2. Es ist ein “Verteilblatt”, das kostenfrei an alle Haushalte wöchentlich verteilt wird.